فادي العاروري
سيدي وزير الأسرى … بكل صراحة خطر على بالي أول ما سمعت موضوع التهم الموجه لك حول ”تسريب الهواتف الخليوية“ انو كم حكون سعيد يوم تكون معتقل في الوقت اللي ”ممنوع“ تندفع كفالتك.
سعادة الوزير أنا بفتخر فيك بشخصك وبتاريخك النضالي المشرف ومواقفك من الأسرى، وان صدق فعلاً انك قمت بتسريب الهواتف الخليوية للأسرى فهذا يضيف شيئاً كثيراً لإحترامي لك.
سعادة الوزير اسمحلي أن أسجل نقطة ولو متاخرة لكنها مبكرة قبيل الأول من حزيران وهو موعد سريان قرارك المتعلق بوقف دفع غرامات الاسرى لحكومة الإحتلال.
سعادة الوزير يعني السلطة الفلسطينية بتدفع غرامات من ترليون سنه ليش اليوم صحيتو ؟
انا كمواطن وبرأيي الشخصي بشوف انو هالقرار هو جزء من محصلة قرارات سياسية متخاذلة تقوم بها السلطة الفلسطينية إيفاءً لوعود هنا وهناك بكبح جماح أي انتفاضة مقبلة ووضع عقبات نفسية أمام كل من تسول له نفسه في مقاومة الإحتلال.
مزبوط اللي بيقاوم بشكل عام ما بيهمه سجن او كفالة بتندفع او لا … بس منطقياً ما دام احنا قادرين نحتفظ برجالنا وبقوتهم وخبرتهم في الساحة ليش لا … ليش نرضى يرتموا في السجون … وهيك هيك الأسرى بيدخلو السجن وطنيين بيخرجوا وطنيين بيسبوا اخت الوطن من اللي بيسمعوه وبيشوفوه بره من المصايب اللي بتصير بين الضفة وغزة وتخاذلات السلطة وضياع القضية اللي بيدافعو عنها.
بعدين يا سعادة وزير الأسرى … بدكم توفروا شوية مصاري ؟ بتقدر ترجع شوي وتسأل حالك وحكومتك وسلطتك كم مليون بيروحوا في الرجلين …. وكم قضية فساد مفتوحة … وكم سيارة فارهة وكم نائب تشريعي نايمين من يوم انتخابهم لليوم بيقبضوا رواتب ومصاريف وأجور بيوت بدون شغل وكم وكم وكم وكم .. هي وقفت على الأسرى يا سعادة الوزير.
سعادة الوزير ما تحكيلي بدنا نقاطع إسرائيل … احكيلك انا بدي أقاطاعها معك بس بدي من حضرتك ومن حكومتك قرار جدي وشجاع بمنع التداول بالبضائع الإسرائيلية .. يعني بالعربي اللي بيتاجر فيها بينسجن .. هيك أنا ححبك أكثر وأكثر وهيك أنت مش بس حتحرم إسرائيل من الغرامات … انت حتحرمها من الغرامات ومن مليارات أرباح بياخدوها من المواطنين الفلسطينيين.
سعادة الوزير إن حصلي الشرف وقرأت هالتنفيسة اعذرني على أول فقرة بس انا متعود احكي اللي ع لساني .. واعذرني اني بدمج بين فصحى وكلام عامي لأنو ما بحكي هيك الا يوم أكون معصب.
شكرا لتواجدك زائر نورت الصفحة 
أمس في 11:19 pm من طرف 
موضوع: بين غرامات الأسرى ومقاطعة اسرائيل وتخاذل السلطة 
