قصة اللي تجوز مرته

سواليف قاضي معزول
تأليف : سعاده عوده أبو عراق
12- قصة إللي اتجوز مرته
نقلها لكم الداعي بالخير صالح صلاح شبانة
مرة فيه ثنين صحاب صارو فوق الأربعين أو قربوا ع الخمسين ، بيشتغلوا معلمين مدارس ، واحد معلم عربي وعامل حاله أديب ومثقف ، وبحب يناقش في القضايا العامة ويتفلسف ويكتب بالجريدة وبيصدر كتاب وبتباهى فيه قدام الناس ، والثاني معلم رياضيات عقليته ممتازة وثقافته كمان واسعة وشخصيته قوية ، لكن معلم العربي متجوز وحده شبه أمية ، ما همها إلا الغسيل والطبيخ ، أما جوزها لا هي شاعره فيه ولا هو شاعر فيها ، أما الثاني معلم الرياضيات فمتجوز مديرة شركة ، عندها موظفين واستيراد وتصدير ومقاولات وتعهدات ، يعني طول نهارها وليلها في الملفات والقضايا وجلسات العمل في الفنادق والمطاعم والسفر برا لعقد الصفقات ، لذلك هو زهقان حاله وبدة مراه حقيقية تقعد معاه ، يوكل هو وإياها ،يشموا الهوا مع بعض ، تعطيه قيمة وكيان ومكانه، تدلعة ، وتقول له بحبك ياروحي ، وهيك كان يحسد صاحبة على مرته إللي ما عندها شُغل يشغلها عنه ، قام قال له صاحبه أنا إللي بحسدك ، عنك مراه متعلمة مثقفة متفتحة تفهم في كل شي ، تقدر تعتمد عليها ، قام قله اسكت أسكت لا مرتي نافعتني ولا مرتك نافعتك ، شورايك نتجوز كل واحد مراه على كيفة ، مادام نسواننا مش قادرين يفهمونا ولا قادرين نفهمهم ، قال له ماشي الحال .
ولما بدت العطلة الصيفية في المدارس ، بدوا مشروعهم للزواج الثاني ، عندها صارت خلافاتهم مع نسوانهم تزداد ، وبطل أي واحد يتحمل مرته ولا مرته تتحمله ، وصار ما أسهل إنهم يتقاتلوا على أبسط شي ، وكأنهم أولاد صغار ،حتى وصلت فيهم أن ضرب كل منهم مرته وخرج حردان ، وراح الاثنين سكنوا في شقة صغيرة مع بعض ، وصار كل واحد يدور على عروس ، لكن ما لقوا النصيب إللي بدوروا عليه ، وفشلت كل دوارتهم ، لكن ظلوا مصممين على الزواج ، ومصممين يظلوا حردانين مع بعض ، وأولادهم ونسوانهم لحالهم .
آخر ما فكروا فيه إنهم يعملوا إعلان في الجريده والمجلات إنهم عايزين زوجات، المجلات إللي فيها إبواب مثل أريد إبن الحلال أو بنت الحلال ، وحطوا المواصفات المطلوبة إللي بدهم إياها ،ووضعوا عناوينهم وأرقام تلفوناتهم ،وقعدوا يستنوا ، ولأن الجميع بيعرف إنه مثل هذه الإعلانات هدفها طق الحكي والتعارف ، أكثر من الزواج ، لم يهتم بهم أحد وخاصة أنهم حطوا أعمارهم الحقيقية ووضعهم العائلي ، فلذلك ما رد عليهم حدا .
لكن بالصدفة شاف واحد من اولادهم المجلة إللي مكتوب فيها الإعلان ، فراح فرجاه لأمه ، وأمه فرجته للمرة الثانية ، فلما قرينة مع بعض ، أدركن الثنتين إنه بدهم يتزوجوا عن حق وحقيقة ، لذلك قررن أن يرسلوا أزواجهم على انهم سيدات أعمال من مصر ، ومن لبنان ، وراحت كل زوجة تتذكر الأشياء إللي بده إياها وبتلكك عشانها ، معلم العربي بده وحده مثقفة نعرف في الشعر والقصة ومعلم الرياضيات بده وحدة تعرف تطبخ وتعرف تغازل وتتغنج وتجيب له قهوة وأرجيلة . فقررت مديرة الشركة تعمل حالها شاعرة من مصر والثانية لبنانية عندها مطاعم في شتورة وزحلة . لكن كانت المشكلة هي اللهجة ، فراحت وحدة تتدرب على اللهجة اللبنانية والثانبة على اللهجة المصرية ، حتى صارت لهجتهم مقبولة .
وما شاف أستاذ العربي إلا والتلفون برن ، وإلا هالوحدة بتعرفه على حالها إنها شاعرة ومديرة تحرير لمجلة (خطوط ) وعايزة منه مقالات وإبداعات ،وانها بدها تعمل معاه مقابلة أدبية ، وإنها ما بتمانع في الزواج منه وقالت له أنا جاية للأردن، وبعد يومين اتصلت مع معلم الرياضيات وحده لبنانية بتعرض عليه عطلة مجانية في منتزهها في زحلة ، فما صدق فيها ، لكنه دعاها عنده أولا، فما مانعت وأعطته نفس اليوم ، وإنها راح تبحث معاه موضوع الزواج .
وفي حركة مرتبة بينهم وبين بناتهم واولادهم ، تقابلوا في فندق ،كل وحدة عاملة مكياج مغيرة فيه ملامح وجهها ولبسها وتصرفاتها ، ولهجتها ، وتكلمت كل وحده في الأشياء إللي بحبها الثاني ، واتفقوا على الزواج ، وسجلوا الزواج عند محامي كزواج عرفي ، حتى يوخذن وقت للتعارف ، وعملوا حفلة زواج في فندق على الضيق ، ولما دخل كل واحد على عروسته ، وكشف عن وجهها ، فوجدها مرته ،
قام كل واحد يقول لمرته أي من زمان افهميني من زمان مثّلي علي .

تسلمي يا كفاح
والشكر للأستاذ سعادة المبدع الحقيقي

القدس الشريف
لك التحية والشكر على هذا التواجد الكريم

ال لينا
شكرا لك ولك التحية

الم قلسطين
شكرا لك
والقصة
للأستاذ سعاده عراق وأنا فقط قمت بنقلها
فاشكر الكبير له