شوال الهم / مشاهد مسرحيه

شوال الهم
مجموعة من المشاهد المسرحية الملتقطة من المجتمع المحلي
جمعها وصورها ووضعها بين دفتي كتاب
الداعي بالخير صالح صلاح شبانة
شوال الهم : يرتفع الستار عن مسرح عليه مجموعة من الأكسسوارات ، يستعملها الممثلون لأداء المشاهد التمثيلية .
على المسرح ممثلان وممثلة .
الممثل /1 :السلام عليكم ... والله ليله حلوه وسعيده لما نلتقي بهالوجوه الطيبه ..!!
طبعا انتوا الليله مشرفينا تتشوفوا عمل مسرحي مش تقليدي ، عمل نتشارك انتوا واحنا فيه سوا ، ومش رح نجيب حكي لا من هنولولو ولا من واق الواق ...!!!
الممثل /2 :المشاهد اللي بدنا نمثلها وانتوا تشوفوها ، جميعها مشاهد محليه خالصه ، بلديه طازه ، لقط لنا اياها أخونا المؤلف المحلي الداعي بالخير صالح شبانه ، من كل شارع وزقه وحاره ، من كل خزق ما بندري كيف زرق فيه ونتش الصوره منه ....!!!
الممثله : ومش هيك وبس ، ورسم لنا هالصور الكاريكاتوريه بصدق واخلاص ، ولو كل واحد فينا حمل مراه ونظر فيها لجوه نفسه ، رح يلاقي شروش وآثار لهالصور واضحه وجليه ..!! واحنا يعني زملائي وأنا هالواقفين قدامكم ، بدنا نمثل هالمشاهد ..!!
الممثل /1 :يعني ممكن في المشهد الأول أطلع ظالم ، وفي الثاني مظلوم ..!!
الممثل /2 : وممكن أطلع في المشهد الأول مجرم ، وفي المشهد الثاني ضحيه ..!!
الممثله : وممكن وممكن وممكن ...جميع الصور الموجوده في بلدنا ، في المجتمع ، في الناس ، رح نجسدها قدامكم ، وبنظل احنا لهالمشاهد مجرد راكوبه ، سياره دراجه طنبر ... بنحمل هالمشاهد وبنوصلها الكم ، هون وفي أي مكان ثاني ...!!!
الممثل /1 : والناس يا جماعة الخير من خلطة التراب اللي خلق ربنا سبحانه وتعالى أبونا آدم عليه السلام منها ، وفي هالخلطه الذهب والتنك ..!!
الممثل / 2 : وفيها الذهب والقصدير ..!!!
الممثله : وفيها النحاس والغاز ...!!!
الممثل /1 : وكل بني آدم منا أخذ من جميع الصفات ..بس صفه بتبقى زايده أو ناقصه عن صفه ، مشان يظهر اختلاف البشر ..!!!
الممثل /2 : (لزميليه)ولو ظلينا فاتحين هالحوار ونحكي مش رح نخلص ، وبالتالي بنحرق العمل واحنا نقدم خطابات ورسائل تعليميه ، لا أنتوا بحاجه الها ولا إحنا ...!!!
وأحسن حاجه يا جماعة الخير ، نبدا المسرحيه اللي مش مسرحيه..!!
الممثله : اللي هي مجموعه من المشاهد ، نقّاها الختيار صالح شبانه ، وحطها في شوال اسمه شوال الهم ...!!!
الثلاثه معا : ويا الله إنكت شوال الهم ...!!!
(يمسكون شوالا ويقومون بإفراغه)...وتطفئ الأنوار ، ويتحركون على المسرح ...!!!

المشهد الأول :
إضاءة على المسرح ،يقومون بوضع ستار طبي على زاوية المسرح ، أحدهم يلبس مريولا طبيا أبيض اللون ، ويعلق سماعة طبية في عنقه ، يجلس على مكتبه ..!!
طرق على الباب ..
الطبيب : شوفي يا سستر فاطمه مين الزبون اللي جاي ..!!
الممرضه : تفتح الباب ، تتنحى جانبا ،(بعجب) : شو ؟؟أف أف أف ...!!!
المريض :( يدخل مسرعا متألما ويده على مؤخرته) آآآآآخ .. آآآآآآآي ..يااا وجعييييي ..!!!
الطبيب : (يقف مستقبلا) ، خير ان شاء الله ؟؟مالك فايت متسربع مثل البزره الفالته من الباربيلو ، بدك مثل السيل توخذ اللي قدامك ؟؟ أقعد يا ابني أقعد (يقدم له كرسيا) ، (يجلس عليه معاكسا حيث يزرع ركبتيه على الكرسي ، محاذرا ملامسة مؤخرته المقعد) ،
المريض : (يصرخ بألم) ، دخيلك يا دكتور ، أنا بعرضك وبطولك وبولادك وحريمك ، بعرض امك ونسوان عمامك واخوالك ، داويييييييييييييني ياااا دكتور داويييييييييييني ...!!!
الطبيب : إبشر إبشر .. تراك وصلت ، شو بوجعك ؟؟؟
المريض : الباسور قتلني يا دكتور ، جمرة نار مولعه في مقفاي الله لا يسيئك .. مشتعل ، بنقف علي نقف ، حاسس حرارته بتطلع من نافوخي ...!!!!
الطبيب : ومن زمان عندك باسور ؟؟
المريض : من زمان يا دكتور ، من زمن تركيا والسفر برلك ، من تاريخ الأنتداب البريطاني لليوم ، من تاريخ الأستعمار يا دكتور ...!!!
الطبيب : ويا خوف قلبي يظل ملازمك تيخلص الأستعمار ..!!!
المريض : لا تسكرها بوجهي يا دكتور ، هو عمر الأستعمار استعمر وطلع ؟؟ هذا باسور أبدي ، ما عنده نيه الأقامه إذا رحلته برحل ..!!
الطبيب : بتحكي صح ، اطرده من الباب برجع من الشباك ، وان قلعته بخلف لك أذناب أعطل منه قصدي الأستعمار مش الباسور ...!!!
المريض : انشلني من وجعي الله ينشلك ، مش ناقصني حكي سياسه بزيد وجع البواسير ، انشلني الله ينشلك من كل شر ، الله يحميك من حكم الأستعمار ، ومن ظلم النسوان ، وما يحكم فيك مره ، بحق اللي بسط الأرض ورفع السما ..!!
الطبيب : (مبتسما) .. آآآه يا مقرود ، الظاهر عليك قلبك من الحامض لاوي ، والنسوان كاويات قلبك ..!!
المريض : (متوسلا) : بعرضك يا دكتور ، خليني في اللي أنا فيه ، وداويني ، خفف عني الله يخفف عنك يا رب ..!!
الطبيب : حتى أعرف حالة المرض ، لازم أعرف حالتك النفسيه ..!!
المريض : حالتي النفسيه مثل اللي برجلك ، وأوطى شويه ، خربان ..(يصرخ بألم) .. خربااااان يا دكتور خرباااااااااااااااااااااااااااااااااااااااااااااااااااان ...!!!
الطبيب : ( مبتسما) : صلي عَ النبي ، صلاة النبي أحسن ...هات قول لي ، بأيش بتحس ؟؟
المريض : (بألم) نار يا دكتور ، بقول لك نار نار نار نااااااااااااااااااااااااااااااااااار ..!!!
الطبيب : طيب ليش ما سعيت بعلاجه من زمان ؟؟؟
المريض : ما خليت ولا بقيّت يا دكتور ، الله وكيلك من الثومه للبصل ، للطيون لشحمة السيارات ، للحنه للشطه الحمرا الغزاويه اللي بتقعد تعاطس ساعه لما تشمها ...!!!
الطبيب (باستغراب): ثومه وبصل ؟ماهي بتطلع من نافوخك ...!!!والشحمه بتهري الحديد..!!
المريض : الله وكيلك ، كل ما سمعت مرتي وصفه من النسوان بتيجي تورّدها في قفاي ، لما صار قاعي مختبر تجارب ...!!!
الطبيب : وانت مجنون ترد على مرتك ؟؟
المريض : (بحزن) : مجنون لأ ، بس مغلوب على أمري ..!!!
الطبيب : (ساخرا) إخص يا جبان ، يا شرشوبة الخرج ، الله يهزك ، مثل ما هزيت سمعتنا .. أنا شخصيا (بهيئة تمثيلية) سيفي بنقط شرار ، بس العب لها بحواجبي بتنخرع وبتهبط على الأرض ، معرقبه رجليها مش قادره تحملها ...!!!
الممرضه : أمانة الله عليك بتحكي صح ؟؟
الطبيب (بحزن) خليها على الله يا فاطمه ..!!!(للمريض) : روح انت ورا الستاره وكشف لي عن باسورك خليني أشوف شو فيه ..!!!
المريض : (ينهض بتثاقل ويمشي بصعوبة) آخ يا باسوري ..آخ ياباسوري ، (يكررها حتى يختفي وراء الستارة) ...!!
الطبيب : (يهمس للمرضه) مش هلقيت لو الواحد تعلم كوافير وفتح له صالون تجميل ، ما بشوف غير النسوان المغندرات ، وما بشم غير العطر ، مش أحسن من الطب اللي ما بشوف الواحد فيه غير القفى المبوسر ، والدمامل السايحه والعنين المقذية والذنين السايله ؟؟
الممرضه : ربنا بعطي كل واحد على قد نيته ..!!
الطبيب: (بقرف) هو قومي زوبعي من قدامي انت الثانية ، بدال ما تجابري علي بتتشفي فيّ ؟؟ روحي ، الله يعطيك على قد نيتك ان شاء الله ...!!!
الممرضه : بكفي انك (تفخم صوتها) دكتور والأجر على الله ، لعاد و نقول احنا يا حسره...؟؟!!
الطبيب : احنا مضروبين بحجر كبير .. صوت عالي وجوف خالي ، اقل مواسرجي يضرب له سيخ في منهل مسكر بطلع أكثر مني ، وبتلاقي عنده عماره وسياره ومتجوز مره أقل ما فيها بجرؤ يصرخ بوجهها ، مش مثل اللي عندنا راكبات ومدليات رجليهن...!!!
المريض (يصرخ بألم) : انا في عرضك يا دكتور ، مشيني وبعدين اقعد اتذمر لما تدوخ ..!!
الطبيب : (وهو ينهض متثاقلا) أيوه جاي جاي ، ملحق على هالقرف وعلى شوفة قفاك البهيه ، يعني مستعجل بده يورجيني فيلم الراعيه الحسناء (يتجه الى الستارة، يفتحها ويدخل) ، (يهتف بعجب) ما شاء الله ما شاء الله ..!!!شوف يا ابني ، قدامك طريق طوييييييل طويل ، أخضر زاهر ، وحظك بسم الله ما شاء الله مثل الفل والياسمين ، بس في قدامك حيه لابدتلك ، بس اتوكل على الله ، انت قد الأعداء وقدود ...!!!
المريض (يقفز عن السرير ، ويرفع سرواله وهو يهتف بغضب) : شو هذا يا دكتور ؟؟ أنا جاييك تداوي باسوري ، ولاَّ تقرالي بختي ؟؟
الطبيب : هذا لو ورجيتني باسور ، بس انت جايب لي فنجان قهوه ...!!!!
المريض : (بألم وحزن) شو أعمل يا دكتور ؟؟ هذي آخر وصفه جابتها مرتي ، مجربه ميه بالميه ، ونتيجتها لطعه بلطعه ، من ما حطيت حفنة هالقهوه في هالمحل اللي ما بنطرى ولا بنقال ، نار ودبت فيّ ، وصرت أشوف البس أسد والصرصور دينياصور ...!!!
الطبيب : (بجدية وحزم) : اسمع يا مواطن ، بتروح عند مرتك الدكتوره ، وبتخليها تنقعك بميه وصابونه ، لما ما تظل ولا ذرة قهوه ، وبعدين بتعمل مغطس ميه وملح ، مشان تعقمه مليح ، وبعدين لما يتعقم بتدهنه بالعلاج اللي بدي أعطيك اياه ، ولما يروح الألتهاب بوجهتك على المستشفى وبتعمل عمليه ، واياك ثم اياك عمرك تدخل على عيادتي الا أحطلك اصبع ديناميت وأنسفك نسف ، يا لله زوبع من خلقتي ...!!!
يقف الممثلون الثلاثة ، ويحنون قاماتهم للجمهور ... يرفعون الستار الطبي ،
الممثل /1 : وأنا بعد ما مثلت دور الطبيب ، الله يكون بعون الأطبا على ما بشوفوا من بلاوي ..
الممثل / 2 : وانا بعد ما مثلت دور المريض ، الله يكون بعون المرضى شو بعانوا من الوجع ..
الممثله : وانا بعد ما مثلت دور الممرضه ، الله يعين الممرضات
الثلاثه : والآن عندنا مشهد جديد ..!!!

[ندعوك للتسجيل في المنتدى أو التعريف بنفسك لمعاينة هذا الرابط]
الداعي بالخير
صالح صلاح شبانة

[ندعوك للتسجيل في المنتدى أو التعريف بنفسك لمعاينة هذا الرابط]
منتديات سنجل الباسلة
الموقع الشخصي للكاتب والباحث صالح صلاح شبانة
هذا الرابط لموقع شخصي وخاص ، وهو محاكاة للتراث الشعبي حسب وجهة نظر الكاتب ، وقد يطلق عليه التأريخ الأبداعي ، وهو يختص بتراث القرية الفلسطينية من وجهة نظر أهل سنجل ، أرجو وأتمنى منكم عدم حذف الرابط بذريعة قوانين المنتدى ، وأرجو من القوانين القفز عن هذا الرابط لما فيه من تواصل بين أبناء الشعب الفلسطيني المهَجّرين ، ولكم التحية .

يعطيك الف الف الف الف عاااااافية يا عمي
مسرحية حلووة كتير

ربي يسعدك ويديمك يا عمي
وضلك تنورنا بمواضيعك الراائعة
كل الشكر والاحترام والتقدير يا عمي

شكرا عمو دولة جنين