مسلسل دموع فلسطين-الحلقة الاخيرة

مسلسل دموع فلسطين...الحلقة قبل الاخيرة

مسلسل دموع فلسطين...الحلقة قبل الاخيرة ......اوعك تروح عليك
اسمحولي على العنوان بس اللي بالقلب بالقلب
اضخم سيناريو عربي درامي باخراج امريكي
بطولة : الممثل الكبير حسني مبارك
الممثل الكبير محمود عباس
النجم الصاعد ياسر عدو ربه
الزعماء العرب على اختلاف اشكالهم
الشيخ الطنطاوي
وعدد كبير من الابطال
الكمبرس : وزراء الخارجية العرب ومندوبي جامعة الدول العربية
مكان التصوير : فلسطين ...غزة
الاخراج : امريكي اسرائيلي اوروبي بلمسات عربية درامية
التمويل : اضخم تمويل لعمل درامي عربي بعد فلم حرب العراق
تجاوز ربع الدعم الامريكي لاسرائيل
عدد الحلقات : كتيير ولا تحكوا مسلسل مكسيكي بس واخيرا قرب يخلص
حقوق البث غير حصري بقناة معينة لاتاحة الفرصة لاكبر عدد انهم يشوفوه ....اول عرض حيكون على الفضائيات الاخبارية الكبرى متل الجزيرة والعربية ....والفضائيات الفلسطينية متل الاقصى ...

خلينا مع احداث الحلقة قبل الاخيرة ...
مظاهرات كبيرة حتطلع بكل البلدان العربية والاسلامية وتنبح اصوات العرب والمسلمين وينحرق ابو عشر الاف علم اسرائيلي وامريكي وتتوالى البيانات بالشجب والاستنكار والتلفزيونات تصدعنا بصور الاحداث والمجازر بغزة وصور الشهدا اللي وصلوا لحد 300 شهيد قابلين انهم يزيدوا كل دقيقة و تولع مع الناس وتندفع الملايين العربية والاسلامية تفضفض اللي بالقلب تحت كنادر الحكام وتنصب اللعنات والمسبات على راس اليهود ....وشوية مسبات للحكام تحذف الرقابة اغلبها....
...
مسيو حسني مبارك من منتجع رئاسي بشرم الشيخ بيراقب الشعب المصري وهو معصب ومقبعة مع دينه من اللي بيصير لناس بيقربولهم بالدم والدين اسمهم الفلسطينيين بغزة....بتقوم تولع فيه نخوته اللي كلنا عارفينها وبنشهدلها وبيرفع سماعة تليفونه وبيتصل باولمرت وهات يا بهادل من عينة بيكفي يا راجل....كفاية بقى انت حتسوق فيها ولا ايه ؟؟؟؟
وبمشهد تاني قيادات الجيش المصري الهمام والبطل بتعطي الاوامر المشددة بتكثيف التواجد حولين رفح خوف من اي تهور من طرف الجماعة اللي اسمهم الفلسطينين - اللي الله يسامحهم دايما بيزعلوا الجيش المصري البطل وبيحاولوا يقتحموا الحدود .وبمشهد تاني كمان بنشوف شيوخ الفضائيات وشلة الازهر بتطلع الفتاوي عن طرف وجنب ..- مهو سوقهم هاي الايام- ...وبيطلبوا من المسلمين الجهاد - وطبعا كلمة حق يراد فيها باطل لا شك - وبتحمى نفوس الشباب اللي مش عارف يروح فلسطين يجاهد فبلاقي حاله تجند عند القاعدة والتنظيمات الاسلامية اللي مكتوب عليها من ورا - Made in america- ....وهون بنشوف البطولة الشرفية لابن لادن والظواهري ..اللي حيطلع يحكي رسالة مسجلة على الاكيد بوحدة من المشاهد ...وبيطلع بالمشهد ممثل تاني اول مرة بيعطوه دور بطولة اسمه مساعد وزير الخارجية المصري ....عشان يشرح للمشاهدين كيف انه الحكومة المصرية بريئة وانه اليهود عملوا مؤامرة ولبسوها لمصر بزيارة وزيرة الخارجية الاسرائيلية ليفني لمصر قبل يوم من الاحداث - وطبعا كلكم شفتوا ليفني بتتوعد غزة وهي واقفة جنب ابو الغيط - برضه واحد من الممثلين المشهورين كتير واله دور البطولة باكتر من فلم ومسلسل - ..وبيرجع مساعد وزير الخارجية يبرر اغلاق المعابر بحجة انه مصر بس ما بدها تثبت سلطة حماس على غزة مش اكتر - لا سبب مقنع صراحة انا كان نفسي اعيط قد ما كان مؤثر وهو بيحكي وبيشكي ...
--------------------------------------------
...
ومرة تانية بيجيبولنا مشهد المحللين السياسين العرب وهم بيحاولوا يفكوا لغز المجازر اللي بتصير على ارض استديوهات غزة ...- موقع التصوير يعني - ....صواريخ حماس وبقية الفصائل بتنطلق بمحاولة بسيطة بيقوم فيها شعب بيندبح وبنفس الوقت حناجر الرؤوساء الفلسطينين التانيين ....متل الممثل الكبير محمود عباس والممثل الصاعد ياسر عدو ربه - وبيدلعوه بهلول - بتحكي انها صواريخ عبثية ولولها كان اليهود ما لقيو مبرر يعملوا هيك - سبحان الله انا صراحة انبهرت كم مقنعيين هالممثلين جد المخرج عرف يختار ...وانا بالاول كنت مفكر انه لازم نفرح انه عنا ميزان قوى بسيط واقل شي بنقدر نعمل رعب عند ولاد الكلب حتى لو كان رعب بسيط من صواريخ بسيطة اتاريه الموضوع كنا فاهمينوا غلط وعبسي وعدو ربه الوحيدين اللي فاهمين القصة لا اله الا الله ....وبيستمر السيناريو تاع المسلسل ....وبيجي دور الكمبرس اللي اسمهم اعضاء جامعة الدول العربية ....اللي المخرج الامريكي اعطاهم الدور المناسب ..وبحفلاتهم السرية ..بيبينوا وهم بيحتفلوا بالنصر الكبير لحلفائهم من اليهود على اعدائهم من اللي اسمه اسلاميين بغزة ..وبمقولة تانية اسمه حماس ...بس دورهم الاساسي بيكون بالمسلسل انه يطلعوا يسبوا على اليهود ويدعوا لقمة عربية جديدة بالزمان المناسب بعد اسبوع من المجازر ..عشان نعطي اليهود الوقت المناسب يعملوا اللي بدهم ياه - قال يعني لو عملوا القمة اليوم كان اليهود التمسوا وخافوا وبطلوا يعملوا اشي...-
-------------------------------------------------------------------------------

النقاد صراحة اعترضوا على كم مشهد مش مناسب للاطفال بالمسلسل ....والرقابة كان الها كلام كمان بحجة الكلام الكبير
تشاهدون بالحلقة القادمة
استمرار القصف الاسرائيلي للمواطنين بغزة بحجة القضاء على الخلايا الارهابية لحركة حماس
اجتياحات برية كبيرة لا والاكبر من نوعها بتقطع غزة لعدة اقسام والشهداء بيتجاوزوا الالف
منتظر زايدي جديد بيحضر حاله للاشتراك باخر مؤتمر صحفي لابطال المسلسل من الحكام العرب والجامعة العربية
والكثير الكثير .......مسلسل دموع فلسطين
موسيقى النهاية تلحين الفرقة الرابعة الموسيقية للجيش الاسرائيلي
الاضاءة ..امريكية باستعمال احدث الاسلحة والقنابل الضوئية
التصوير ..عربي 100% باحدث كميرات الجزيرة والعربية والحرة وكل القنوات ...

الى اللقاء بالحلقة الاخيرة من دموع فلسطين ...
--------------

اسف كتير على الاسلوب اللي استعمتله بس اللي بالقلب بالقلب وضريبة الحرية حندفعها بالدم حتى لو كل العالم كان ضدنا بس الكل بيعرف مين غزة ومين فلسطين ومين حماس ومين فتح ومين الجهاد ومين ابطال المقاومة الفلسطينية ....الشعب اللي بعت شبابه باحزمة ناسفة مش حيعجز يدافع عن حاله وباذن الله فلسطين حتتحرر بايدي الفلسطينين نفسهم .....والشعب اللي علم الدنيا كلها معنى الجهاد والاستشهاد مش حيعجز يطبق على حاله هاد الاشي وفلسطين حرة حرة حرة برغم كل شي ولو استشهد مليون حيضل اللي حيرجع بلدنا ..الله اكبر ..اللهم انك تعلمانا مظلومين فلا تحرمنا من نصرك اللهم امين المارد الاحمر-بيت عنان

يعطيك الف غافيه اخي المارد الاحمر على هالمسلسل اللي بيسم البدن بس وحياتك انك بتحكي عين العقل والصح مشكور على مسلسلك اللي بلا شك في قمة الدراما وجزاك الله كل خير فتقبل مروري واحترامي اخوكم ------عنانــــــــــــــــــــــــــــــــــــــــــــــــــــي

مسلسل دموع فلسطين-الحلقة الاخيرة 1141412009

شكرا لك على الموضوع

>> الصدق أقصر الطرق للإقناع <<
>> إذا أردت أن تكون عظيمًا فاعمل بصمت <<
>> عليك بطريق الحق ولا تستوحش من قلة السالكين <<
>> إذا كانت الحياة بحر من الهموم فاركبها بقارب من الصبر <<[img]

يا ريت يكون يوم الحلقه الاخيره قريب جدا لانه المسلسل تكبد خسائر بشريه وماديه باهظه ولان المسلسل طويل شايفه انه المشاهدين في العالم صار عندهم ملل وبطلو يتفاعلو مع الاحداث.... بعين الله اخي المارد الاحمر وشكرا كثير الك على هل مشاركه

التوقيـــــــــــــــــــــع