العتابا

موضوع: العتابا 02/03/09, 03:44 am

أوف
وعِنّا الفنّ مش تقليدْ أصلي
عدوِّي اللي كواني بنار أصْليه
أنا فلسطيني من فصْلي وأصلي
ما بنْسَى سهولْ أرضي والهَضابْ

أوف
بلادي منها الغاصب حرمنا
لحتّى شرَّدوا اطفالنا وحريمنا
والصَّخرة إنداستْ وحرقوا حرمْنا
وهذا غير اللي جاؤوا تكميل لحسابْ

أوف.. يا باي

بيُومِ الكرامِة إنْكسَرْ جيش الخصِمْ
وكانتْ خسارِتْهُم ألف بعد الخصم
وربِّ البَريّة والنّبي يبقُوا الخصِم
للِّي سَعُوا ولَلِّي دعوا لحَرْبِنا
كلِّ العيون عيون وانتو عيوننا

أوف

إللُّي بخُونِ أوطانُه خاصمْنا
ومِن هذا الشّعِبْ فعلاً خاصمْنا
وحُبّث الوطن طعمانا وخصمْنا
وعلى درب الفدا اعترفنا الصَّوابْ

يا ميجنا ويا ميجنا ويا ميجنا
زهر البنفسج يا ربيع بلادنا

أوف.. أووف يا با باي

الشعب قال أنا بفخر بعيدي
ومهما تكون أوطاني بعيدِه
ومين اللِّي لأوطاني بعيدي
غير التّضحية ودمِّ الشباب

يا ميجنا ويا ميجنا ويا ميجنَا

قالوا الشعب قد على مجدُه
علا ومن بعدِ هذا اليُومِ بزوِّد عُلا
ولولا بعزِّ عليِّ وعَ هلفِرْقة وعلى
هالنّاس ما غنِّيت شطرة ميجنا

يا ميجنا ويا ميجنا ويا ميجنا

يا خيِّ- فُرقِة الأوطانْ مُرّة
ولهذا قد شربنا كؤوس مُرّة
بحبِّ اشُوفْ بلدي بَسْ مرَّة
تكون محَرَّرة وراحُوا لِغْراب

أوف

يا عِيْدنا يا فخرِ كُل اعيادْنا
وعيد انطلاقة ثورتي ببلادنا
وعيد اللِّي ضحُّوا من أجل إسعادنا
ضدِّ الجُناة ال ساهموا بإبعادنا
بعيد الشعب بنهتف بأنشَادْنا
وإلكُم تهانينا بهذا الإحتفال
ويا ريتْ هذا الحفِلْ جُوَّا بلادنا

أوف

لو كِلّ يومْ بتهدُّوا مخيّم
عُمرِ السِّلِم عَ بلادي ما خيّم
ومهما الظلم يا بيغن ما خيّم
سيُمنحى بفعِلْ أبطالِ العرب

أوف

وثورة شعبنا ركبت حُصُنْها
وبسواعِدِ الفدا تقوَّى حصنْها
وبقلبي وفِكري بحفظْها وبصُونها
وبفديها بدمّات لِعصابْ

دلعونا

لمّا لِلفَنِّ الشّعْبي غَنِّينا

قصدْنا تانحيي ترابِ فلسطينا

حُبِّك يا بلادي صارِ يغذِّينا

بأجمَل أغاني على دلْعونا

وحُبِّي للوطن راسخ بقلْبي

بالدَّمِّ الغالي فرشنا الدَّربِ

لأجل تحريرِك يا فلسطينا

يا ثورَة مِدِّي يا ثورة مِدِّي

لتحريرِ الوطَن يلله استعدِّي

شِبلِ منِ أشبالِكْ باطناشرْ جُنْدي

أما المجاهد اطناشَرْ دزِّينا

وبكمائن ما بنهادِنْ

جيشِ الغادِر للمَمات

وبالكرامةِ رفعتِ اعلامي

وفوق اعلامي إلرَّاياتْ

ويا مجاهد يا ابن بلادي

على الجوادِ اعمَلْ جولاتْ

وباسِمْ فِرقتنا لابعث تحيِّة

يابا لكُفُرْ شُوبا والهَبّاريِّة

ومُخيَّم صبرا والرَّسيديّة

الرَّشاشِ بيحمي غُصْنِ الزَّيْتونا

غَرْبيِّ النّهِر دخلْتْ دَوْريِّة

ضمّت مجموعة فلسطينية

دمّر دبابة مع خمسميّة

أمّا الخسارة اطناشرْ صهيُونا

ربِّي هالفرقة بعونَك خلِّيها،

خلِّي الدَّبيكة والغنّا فيها

ثورة شعبنا ربِّي يحميها،

وينْصُر ثورتنا عَ اللي يعادُونا.

يا شبل الثّورة قُودِ الدَّبابة

من نهرِ الأردن حتّى عرَّابة

وإهجِم عَ العِدا فُوقِ الرَّوابي،

وع قُومِ النّذِلْ إبن صهيونا

شعبي للوطن قدَّم هدية

الرُّوح العزيزة لأجل القضيِّة

لا يُمكن نرضى بالصِّهيُونيّة

على تُرابِك أرضِ الزَّيتونا

سلاحنا بيدينا هذا أمانة

وحتّى نحرِّرك كلِّ الأوطانِ

وما في بشعبنا واحد جبان

يسَلِّم سلاحُه لو كان مجنونا

اهازيج تغنى في السامر الفلسطيني

اول مابد البادي صلوا على النبي ياخواني
عالالف ولفتك يازين اخذتك وليفأ ليا
عالباء ربي رماني بحضين البنت النشميه
عالتاء توهت عقلي يارب ترده عليا
عا الثاء ثلاثه مرين وعيني عالوسطانيه
عالجيم وجميلك بارخ قومي تانركب يابنيه
عالحاء حلن شعورهن حنشان وانهالن عليا
عالخاء خلخل عظامي مثل الاقلام المبريه
عالدال دلوني بالبير وقطعو الحبل فيا
عاالذال ذللت نفسي يانفسي عزت عليا
عا الراء رنت حجوله مثل لرعود القويه
عاالزين زينت الساحات ومشيه بالحاره غيه
عا السين سالت دموعي ماعادوا اطلعو فيا
عاالشين شالت ظغونه في فلسطين العاليه
عاالصاد صادولي حبي وارد عابير الميه
عااضاد ضبع يوكلكم ياللي ماتردو عليا
عالطا ء طابت السهره قومي تانرقص يابنيه
عالظاء ظليت ادور عا ام عيون العسليه
عا الفاء فاحت راوايح عطور وريحه شلبيه
عالقاف قالت ياحبيبي ماتفجع قلبك عليا
عالكاف وكفكفت دموعي حبيبي ماانتبه ليا
عا العين عينه قتلتني بلتني كل البليه
عا الغين غالي عليا والفرقه صعبه عليا
عااللام ولاموني بحبه اصحابي وحكيوا عليا
عاالميم ومالت همومي وزادت احزاني عليا
عالنون ونهروني اهلي في حبه وزعلو عليا
عالهاء وهالت دموعي وفراقه غالي عليا
عالواو ودعت اصحابي والغربه صعبه وقويه
عا الياء يارب اجيبه محبوبي غالي عليا

وهناك ايضا في اعراسنا وهو ايضا السامر لكن بطريقة اخرى جماعه يقولون بيت من الشعر ويرد عليه من المجموعة الاخرى بشطر اخر وهي كالتالي:-

يابنت شيخ العرب يام العباه الزرقا وابوكي شيخ العرب حاكم على البلقا

والسيف بطال واللي حامله بطال ويش علمك عالمراجل ياردي الخال
ياحامل السيف سلم لي على نصابه تسلم يمينك خلي السيف لصحابه
ومعلقه بالجبل يارجل شناره زكام من مليحه مع النذل ياخساره

لاتحسبو كثرتكم تغلب شجاعتنا بالسيف الاحدي لنقلط جماعتنا
لاتحسبونا مشينا الحرب ذالينا واحنا من الحرب عنقرنا طواقينا

لاتحسبوا الغي في طرف المناديلي الغي جر المناسف للرجاجيلي
لاتحسبو الغي في جر الشالات السود الغي جر المناسف في الليالي السود
والبن الاخضر جبناه في محارمنا نسقيه للجواد ونقضي مصالحنا
يعطيك يعطيك ياللي اعطيتنا الفنجان يعطيك حلوه غريره مثل عود الزان

ثلاث بنيات عالبيدر يغربلن يامندرى اجوزن ولا كما هينه
لما يغيب القمر ويناموا جيراني لفرجك ياحلو عا دق ذرعاني
مسيك بالخير ياللي جيت ها الساعه خصرك رقيق وبيدك خاتم الطاعه
مسيك بالخير يانايم على نايم ياللي عاصحن خدك يفطر الصايم

مسكين ياخاتمي ياللي خذوك الناس خذوك مني ذهب ردوك علي نحاس
والرمل ماينعجن والشوك ماينداس واسر ما ينطلع على جميع الناس
وليش ياموت اخذت صاحبي عني طمرته بالرمل وانه العمر متوني

شكرا لتواجدك زائر نورت الصفحة

فلسطين : اذا أحبك مليار مسلم فأنــــــا منهــم 00

وان أحبك شخص واحد فهو أنــــــــــا 00

وان لم يحبك أحد فاعلمي أننى قد مت 00

من هنا يمكنك مراسلة الادارة

موضوع: رد: العتابا 02/03/09, 04:38 am

شعبي للوطن قدَّم هدية

الرُّوح العزيزة لأجل القضيِّة

مشكور ابو مهران

التوقيـــــــــــــــع

موضوع: رد: العتابا 02/03/09, 12:37 pm

الله يعطيك العافيه ابو مهران ...
بجد بلزمنا لويح وصف دبكه هههههههههه
يسلموووووو

العتابا 1467489_10201877501412011_379037141_n

من هنا يمكنك مراسلة الادارة

موضوع: رد: العتابا 08/03/09, 02:39 pm

هيك يا ابو مهران اجرح من الاول قطعط قلبي قولو اوووف