أبو عنتر

موضوع: أبو عنتر 25/01/10, 05:54 pm

[center]أبو عنتر
صورة محكية ساخرة
بقلم الداعي بالخير : صالح صلاح شبانة
أبو عنتر ، زيت وزعتر ، على خبز مقمر ، بين النسوان ، تشوفه هيمان ، يُعرُم مثل ذكر الحمام ، ويتبختر
جالق عن سن الذهب نيعه ، كأنه بده يبيعه ، بس يا خساره ، يا بو عنتر ، اليوم عطله ، والسوق مسكَر
قديش عنده حكايا ، وأسرار وخفايا ، عن بطولات وهميه ، صنعها خياله ، يمدها قدام الناس وعليهم يتفشخر
أبو عنتر ، والجاجه السمينه ، والديك لِمدحبر ، متباهي بريشه لِمبَرَّق ، الي بتلاقيه من نعف المزابل معَفَر
قصه من قصص الخيال ، من يوم ما تغير معنى اسم الذبانه ، اللي بقت عنتره ، لبو الفوارس المنصور لِمظفر
وصارت العنتره بطوله ، وصارت اسمنا وفعلنا ، وعزّنا وفخرنا ، وناموسنا وتاجنا على الراس
أبو الفوارس عنتر
عنتر وأبو عنتر ، الزيت والزعتر ، ورصيص الزيتون ، بالفليفله الحَرّاقه والليمون ، وخبز الطابون لِمقمَر
**********
أبو عنتر ، زيت وزعتر ، إسم الله عليه ، وبركة الخضر لِخضر ـ اللي قتل التنين ، وغمس بدمه الرمح والسهم والسيف
أبو عنتر ، زيت وزعتر ، صحن الصيني الرنان ، فارس الحريم والنسوان ، نِيّاله شو عَ باله ، نجم ليالي الهيصه والكيف
ابن البارات والخمارات ، وما يحوم حواليهن من همالات ، دق الوشم وبَرَّم الشنبات ، ما صايبه من الدنيا ظلم ولا حيف
بتحطه عَ عيونك ، رجل المهمات والملمات ، كل ما شعلت طوشه ، تشوف ضرب القناوي والدبسات اشي مخيف
ضريب امواس وشفرات ، مدقدق بالوشم ، ولا ابن عمه لسميره توفيق ، يا مدقدق يا بن عمي ، الله يسعد لي ها لطيف
أبو عنتر ، زيت وزعتر ، يمشي ويتبختر ، يكذب ويتفشخر ، نسخه أصليه ، مِيّه با لميّه ، ما فيها ولا زيف
مونة الشتويه ، قمح وعدس ، بصل وزيت ، كرسنه وبيكيا ، قيطاني وهيتيه ، زبيب وقطين ، منشف في المساطيح من الصيف
***********
أبو عنتر، يا أبو عنتر، قريعه وميرميه ، حليب صافي ، وجبنه طريه ، ولبن في الكيس ، أكلات عليها ما بيتخيّر
أبو عنتر ، يا مونة الدار ، قمح في الخوابي وزيت في الجرار ، علف للديك والجاجات ، وتبن للغنمات وللجحش لِخّدَر
أبو عنتر ، زيت وزعتر ، وارث البطوله ، جيل عن جيل ، اطويل وهبيل ، منفوخ وماخذ في حاله مقلب امدَّبَر
أكبر ساقط في المدارس ، قدام البنات فارس ، جسم بغّالي ، صدر واكتاف اعراض ، بتحرث عليه مارس ، وما بتتعثّر
سوسه وعفن ، وشرِّيه في البدن ، ابليس امصَفّى ، إن اتحركَش وزّن ، خلاّ لِبلاد العامره بأهلها تتدَّمَر
أبو عنتر ، زيت وزعتر ، إن سمع بمصيبه ، غنّى وزمَّر ، صفيه المشتفيه ، اللي بتنصح عَ الخراب و الأذيه ، وبتتدحبر
وين ما إجا ، ووين ما راح ، بصنع بطوله وهميه ، عن الشاطر حسن ، والغول السفاح ، والعنقاء ، إمحَيِر ومحَيَّر
***********
أبو عنتر ، زيت وزعتر ، غزلاني ولطيف ، حلو وخفيف ، قدّام الغشيم ، بتتنهد على حاله ، وبتهمس يا لطيف
شو ها لغزال الشارد ، ها لحلو اللي سكره زايد ، وهو قرد امقلّد بقلايد ، رباطه ثقيل ، ما بنفعه الزرد الخفيف
كل ما ثقلت رباطه ، بجيك طيبه ، وحلو محاكاته ، صنف مربى عَ الكرباج ، وبتربط وبتمكّن بحبال الليف
أبو عنتر ، يا مربّى عَ الدلال ، وكل الناس بتعرف ، جوّه راسك موال ، جوّه ثمك بنبض ، وبتسحسل عَ الشلاطيف
ولمّا موالك يتسحسل ، نِيّال غايب الطوشه ، ولاّ المشغول بهوشه ، نيّال الأطرم ، والغبي واللي مش حصيف
بغنيه المولى عن هذيك السمعه ، واللي أذاها أكبر من حلاها ، وبتوجع البطن لمّا مثل الشربه تِقرف وتعيف
أبو عنتر ، زيت وزعتر ، تِعلا وتكبر ، وايامك عز وسعاده ، وآخرتك أساطير وخراريف
تقرأ بلهجة أهل سنجل

[/center]

موضوع: رد: أبو عنتر 29/01/10, 10:55 am

مبدع ما شاء الله عليك يا اخي
[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

» عودة عنتر
» عنتر وعبله 2009
» عنتر يحيى صخرة دفاع الجزائر