كنز الحرذون قصه من الفلكلور الفلسطيني القديم

بقى واحد عطال بطال ، مثل الكلاب بلا تشبيه ، يحب الجوع والراحه ، ومرته واولاده ،
مش لاقيين حق فردة قمح، قاتلهم الجوع
قالت له المره : قوم يا ابن الحلال دوّرلك عَ شغله ، إرحم حالك وها لأطفال..،
سد رمقهم بلقمه ونشف من عيونهم الدموع
تململ الزلمه وتحكوَك وسحب حاله ، حَط ها لطوريه عَ كتفه وطلِع على ها لخلا ،
عَ البر البكر اللي مش مزروع
بقى حرذون واقف عَ راس ها لرجُم ايصلي ، إيهز راسه ، صباح الخير يا بو سليمان،
يا للي عَ الرُجُم مرفوع
أنا زلمه على باب الله ، ومرتي مفتريه ، ولازم أشتغل واجرتي ليره ذهب يا ترى عندك شغل ؟؟
هز الحرذون راسه ، كأنه بسمح له با لشروع
بلش شغل في ها لأرض الواسعه ، اللي حسّبّها صاحبنا أرض الحرذون ،
وارثها أب عن جدْ عن الأصول امتدت للفروع
والمسا الله يمسينا ويمسي السامعين بخير بعد ما التعب هَدّه ،
والشغل وضرب الطوريه كَسَّر الضلوع
راح يقبض أجره قبل ما ينشف عرقه ، ..آه يا بو سليمان ؟؟
مد إيدك على ها لعامره واهرش ، ترى أخوك قنوع
كل طلبي ليره مثل ما اتفقنا الصبح ، وانت شفت بعينيك
اللي بده يوكلهن الدود ، العنوان والموضوع
هات يا بو سليمان ، أبو سليمان ايهز راسه ،ويتابع صلاته
صلاة الحرذون اللي بنضرب مثل لكل قصه متبوع
هات يا بو سليمان ، أبو سليمان يهز براسه باطل يا بو سليمان ،
مش كل الطير بتاكل لحمه ، ولا كل زلمه مضبوع
حِمِي الدم في راسه ، ما ظل فيها ، طال ها لحَجَر وضرب عَ الحرذون ،
الحرذون زرق في الرُجُم ، بلا حَسَفه ولا حِس مسموع
بس وين ؟؟نط عَ الرُجُم مثل القرد ، يزرق الحرذون تحت حجر ، يطول الحجر
لمَا نقض الرجم وراه نزول وطلوع
ولاَّ باب مغاره مفتوح ، زرق الحرذون ، وأخونا وراه ، واذا بدست ذهب ،
ها لذهب إيوّج ويلمع الموع
تنفس براحه ، الله يقطع شرّك يا بو سليمان ، لازم تتعبني وتقطع نفَسي
روح يا لبعيد يا ريت نفسك مقطوع
وجكر فيك هاي ليره بدل تعبي الحلال ، وهاي ليره بدل الرجم اللي نتعّتني اياه ،
وحرقت فاطسي وخلعت لي الروع
طال ها لليرتين من ها لدست اللي بعبي شوال ، وبهبط تحته حمار ،
ولو شافه عاقل كان طلع مرتعب ومخروع
أخذ ها لليرتين ، ورَوّح معنق مثل الديك عَ الشقفه ، رماهن بوجه مرته،
خذي اتمصرفي يا هجينه وسدي الجوع
لقفتهن وهي مش شايفه الفضا ، يا قبرت أمك!!منين جبتهن ؟؟قال لها :
عرق جبين بشهادة ثوبي المنقوع
عند مين اشتغلت ؟؟ ولك يا دوب بشهر عامل اكتافه اعراض يجيبهن ،
ليرتين ذهب ما جابهن صاحب مشروع
قال لها : اشتغلت عند أبو سليمان ، وربنا سبحانه منعم ومتفضل عليه ،
عنده دست ذهب بخلي عقلك التافه مصروع
ومين أبو سليمان ؟!مين أبو سليمان؟! رد يتجقم عليها ، أبو سليمان الحرذون ،
اللي بدك تتمشي أرضه اسبوع
وبنهد حيلك وما بتوصلي رزقه والله ساقها ، كل يوم ليره ذهب ، ويا عالم يا رب ،
وينته بخلص ها لموضوع
قرَّبت عليه تتحلس فيه ، وتخطف مثل الضبع عقله ، وهو جوزها وعارفته عنده عقل ،
في أحسن الأحوال مثل النعل المنقوع
ولمّا قال لها : أبو سليمان الحرذون اللي في الرجم ، لمعت الفرحه في عيونها ،
والله جابها الله واجت بسبك يا مخلوع
نام يا حبيبي ، إنت زلمه شغيل ولازم ترتاح ، قام اتعشى وغز كوع وراح نايم ،
وشخيره لأبو موزه على أعلى موجه مسموع
تاني يوم طلع من الصبح بدري ، طوريته عَ كتفه قاصد أرض أبو سليمان ،
وبقت وراه تقص أثره ، تابعته تبوع
والمسا بعد ما روّح واتعشا ونام ، أخذت إبنها ولِحمار ، وحملوا دست الذهب ،
ورجعوا معنقرين مثل النموره والسبوع
وثالث يوم بعد ما خلص شغل راح يقبض الليره الذهب ، لقي إيده والسهله ،
قال لحاله : والله ساوتها بنت الملعونه والجربوع
رجع يرغي ويزبد ويهدد ، غير يشكيها للقاضي ويخلي القرد يضربها
على ها لسواه ويعتم عمرها ويطفي منه الشموع
بس بقت امحَضّره طبخة كرشات وروس ، ورشمتها في الليل بره ،
وقالت له : قوم يا خايب ، الدنيا أشتت كروع
قام يلِم ويوكل ، يا حلالي يا مالي ، ولمّا راح عَ القاضي يشكي عليها ،
قالت له : إسأله يا سيدنا القاضي ايمتى صار ها لموضوع
قال : لما الدنيا أشتت كرشات ، قام القاضي ضربه أكم من كف وطرده ،
واتهنوا بالكنز وراحت أيام القهر والدموع

التوقيـــــــــــــــــــــع

[ندعوك للتسجيل في المنتدى أو التعريف بنفسك لمعاينة هذه الصورة]

العمل عباده وابو العبد رزقه على ربه

الله يخرب بيتها الي بتوخد واحد مثل ابو العبد كان ما بتبقى طول عمرها ايدها والحصيره ، لكن ربك كبير وعلى راي المثل (بتيجي مع الهبل دبل ).ههههههههههههههههههههههههههههههه

شكرا ملاك على هالقصه الي ما تاركه كلمه من زمن العهد العثماني للفلاحين الا وذاكرتها .

يعطيك العافيه وتقبلي مروري.

[ندعوك للتسجيل في المنتدى أو التعريف بنفسك لمعاينة هذه الصورة]
[ندعوك للتسجيل في المنتدى أو التعريف بنفسك لمعاينة هذا الرابط]

والله حسيت حالي اني قاعد ورا ابو يمين وواحد من هالختايره بيحكيله بالقصه عنجد قصه حلوه وبتستاهل انو الواحد يحكيلك الله يعطيكي العافيه والله يسلم السانك عقولة ستي ويسلم عنيكي بس اويلي هالابره ههههههههههههههههههههههههههههههههههههه سلامات اخوكي -----عناني

[ندعوك للتسجيل في المنتدى أو التعريف بنفسك لمعاينة هذه الصورة]

» الفلكلور في بيت عنان / القسم الاول
» لعرس الفلسطيني,,اجمل صور التراث الفلسطيني في قريتنا بيت عنان
» الفلكلور المقدسي في استقبال حجاج بيت الله الحرام
» الحوار الفلسطيني الفلسطيني بالصوره
» مذياعي القديم