بقينا و بقى زمان

موضوع: بقينا و بقى زمان 02/01/12, 11:42 pm

بقينا و بقى زمان
صورة تراثية للقرية الفلسطينية
استوحاها وعاشها وكتبها
الداعي بالخير : صالح صلاح شبانة
[ندعوك للتسجيل في المنتدى أو التعريف بنفسك لمعاينة هذه الصورة]
بقت عنا أرض عَ مد النظر واطول ، أرض حمرا مجبوله بدم وعرق كثير
وبقين كل العيله ، كل القريه خدامين لها لأرض ونواطير
ولضربة الفاس في الأرض صدى لمّا يثمر التعب في الحواكير
وبقت الأرض كل أحلامنا ، وبقت عمرنا ربطتنا وإياها المقادير
وبقى سيدي من صيحة الديك لزحفة العتمه عايش حلم كبير
يا إما ورا فدان البقر حرّاث ، إن عِطِش شرب من مية الجهير
و إن جاع أكل فتّه مدَّهنه بزيت ودُقّه وأكم من حبة جرجير
ولدقة السكه في الأرض نغم ، وببذر القمح في الأرض عفير
يا إما في كروم العنب والتين ، بُنقل النتش والشوك عَ الحمير
إيّوَرِق الدوالي ويرُش الكبريت ، تيصير القطف قد الأمل كبير
وبقت الأرض تعطي إللي يخدمها قد التعب والعرق خير كثير
وبقت الأرض تعطي اللي يخدمها ، قد التعب والعرق خير كثير
آخ عَ المنطار كيف بقى بينه وبين الأرض عهد ومصير
آخ عَ ليالي المناطير والقمر ، والليل والسمر وزقزقة العصافير

بقت عنا أرض مثل الذهب ، تِطلِع قمح وعدس وشعير
وبقت الناس للعهد وفيه ، وعندها أخلاق وذمه وضمير
وما حدا بسرق قوت حدا ، ولا غني في القريه ولا فقير
ولا حدا بشيخ عَ حدا ، وما بطلعوا عَ الفلاحين المخاتير
إن جاعوا بجوعوا سوا ، وإن شبعوا بحمدوا الله كثير
يديم كراديش الذره وخبز الشعير، ويخلي للحياه معايير
مشان ما حدا يوكل لحم حدا ، ويظل القلب عَ القلب بصير
كل الناس عيله وحَدَه ، والكبير بعطِف عَ الزغير
والزغير بحمِل الإحترام والمحبه ، وبحني للأبو قامته بتوقير
كل أحلامنا وأمالنا بدارنا ، ونفوسنا مرتاحه عَ الأَخير
قمحاتنا بخوابينا وزيتاتنا بجرارنا ، وبإدينا بننسج لِبّساط والحصير
وفراشنا من صوفنا وطواقينا ، من مِغّزل الشعر بتصير
سبحان إللي خلق الأرض ، وخلاّ الكون يسبح بحمد القدير

بقى سيدي يعيش المواسم حِلَم ، ويعشق صوت الرعد والهدير
ويتحمم مثل السبَل عَ حبّات الندى ، ومثل الورد إلو عبق وعبير
وبِبَحْر عَ صليبة القمح بشٌكُر ، وببوس رغيف الخُبُز بتقدير
آخ عَ القريه وأيام القريه ، وخميس لِمّوات والمخمر والفطير
والبيض مسبوغ بوَرَق البصل ، أحمر ريحة الفرح منه بتطير
جُمعه نبات وجُمعه أموات ، والصدَقَه عَ قد الدخل بلا تقتير
وجُمعه بتغسل اقداح لِمّوات ، وبنزل من السما مطر غزير
آذار يابن عمي ثلاثه منك ، وأربعه مني تنوفي التقصير
السبع تيّام المستقرضات ، تشحط العجوز وغنماتها وخربوشها يطير
وحطباتك الكبار خبيهن لعمّك آذار ،أبو العز والمطر الغزير
سبع ثلجات كبار إيكِتِّن عَ الأرض الحنونه يطِلعِن الخير
وشتوة نيسان بتحيي الإنسان ، وبتبقيه جاعِص عً الحياه أمير

مَ اكثر مواسم القريه ،أُخُوّه وأُلفه ........وحُب كبير
إن غامت السما وقرّب المَطر ، قام الفلاّح عَ العود و النير
وتعلقت عيون الناس بالسما ، يا رب تعطينا خير كثير
يا رب تشتي ها لدنيا وتزيد ، تنسقي الأرض ونعبي البير
زيت وبصل وقطين ، وقمح وكرّسنه وعدس دِمِير
وهيتيه قطمه وتبن قيطاني ، ونخاله معبيه المعالف والسحاحير
آخ عَ اللوز الفرك لمّا يفرك ، وبرقوق البنجر ومسطاح الذبيل
وشلية الغنم مرّوحه المسا ، بعد ما ضربت في الأرض مشاوير
ودّرار الغنم مليانه حليب ، والبركه من الله البصير
آخ عَ نفخ السقا وخض اللبن ، ودَرْج القطا و مقاقاة الشنانير
وبقت القريه حِلِم مثل القمر ، ليله مثل نهاره منير
ولكل شهر من السنه موسم ، وحِلِم قد الموسم ينام قرير

شكرا لتواجدك زائر نورت الصفحة

[ندعوك للتسجيل في المنتدى أو التعريف بنفسك لمعاينة هذه الصورة]

فلسطين : اذا أحبك مليار مسلم فأنــــــا منهــم 00

وان أحبك شخص واحد فهو أنــــــــــا 00

وان لم يحبك أحد فاعلمي أننى قد مت 00

[ندعوك للتسجيل في المنتدى أو التعريف بنفسك لمعاينة هذا الرابط]

موضوع: رد: بقينا و بقى زمان 03/01/12, 11:03 am

الى جنات الخلد يا عم صالح
شكرا يا ابو مهران على النقل

[ندعوك للتسجيل في المنتدى أو التعريف بنفسك لمعاينة هذه الصورة]

» كم بقينا نحرس ظهورا غادرت
» رمضان زمان
» اااه...........يا زمان
» ساق الله عَ أيام زمان
» ساق الله عأيام زمان